Search
  • CIOMON

OpenRice - 觀塘新開韓式飯卷店 韓港夫婦主理 Grab & Go韓國住家風味

隨住疫情嘅發展,香港人嘅用餐模式都慢慢開始改變,愈嚟愈多人都會揀Grab & Go,方便快捷又可以減低同其他人嘅接觸。最近喺觀塘就開咗間由一對港韓夫婦主理嘅韓式飯卷店,配料同醬料都由韓國直送呢。





舖頭主力供應8款唔同口味嘅韓式飯卷,包括經典紫菜飯卷、蝦肉蛋黃醬紫菜飯卷等,另外亦照顧埋生酮同素食者嘅需要,備有生酮巨型卷、無飯韓式手卷同埋菠菜豆腐紫菜飯卷,每日喺自設廚房新鮮製作,絕不添加味精或防腐劑。





要試真功夫,當然就要試最原始嘅經典紫菜飯卷。加入醃蘿蔔、菠菜、蛋、紅蘿蔔條、火腿、蟹柳等製作,飯粒較黏,食材口感爽脆,米飯更帶著微微嘅麻油香。





而人氣最高嘅係烤牛肉飯卷,佢哋特意挑選脂肪含量低嘅牛肉,再配合韓國傳統醃牛肉嘅醬料,以大火快炒,食落香口重有啲肉汁。




(左)豬肉泡菜紫菜飯卷、(右) 蝦肉蛋黃醬紫菜飯卷






預告定,遲下重會推出好似厚版紫菜三文治咁嘅韓國人氣疊疊堡,大家可以自己親手包疊疊堡,一次過滿足晒打卡同飽肚嘅願望。舖頭另外亦有韓式小食同湯品供應,好似韓式炒粉絲同海草牛骨湯等,無論喺屋企定野餐,都可以感受到滿滿嘅韓國住家風味呢。






18 views0 comments